عندما أتصفح الفيسبوك أو تويتر أقابل الكثير و الكثير من الموضوعات و التدوينات التي تأخذني و يأخذني سلاسة أسلوب كاتبها أو مدونها و تشعر و أنت تقرأ أنك نفسك تقول الكلام اللي بيقوله فقررت أن أخصص في موقعنا شعب مصر باباً للتدوينات الحرة لكل من يُحب أن يكتب في موضوع يُفيد المصريين أو يُنعش ذاكرتهم أو يُحيي ذكريات الماضي الجميلة أو يُعطيهم نصيحة مفيدة .الفيسبوك .
Mohammed Salah
فكرة دفاتر الحضور والانصراف اللي شغالة حول القمة العربية الغير عادية بجد غلط كبير ، احنا عملنا انجاز كبير جداً النهاردة ، بقى عندنا مقترح مصري بتوافق عربي وشراكة مع الاتحادين الاوروبي والأفريقي ومنظمة المؤتمر الإسلامي ، وبدعم ومشاركةمن الامم المتحدة بنفسها ، ممكن بعد اذن الدنيا افهم ليه بنضيعه بحسابات مين حضر ومين محضرش؟!!وعموماً ، من بعد ٢٠٠٣ مبقاش ينفع نقيم الأمور بمين حضر ومين محضرش ، قبل ٢٠٠٣ كان ممكن ، بنتكلم من وسع ومفيش مشاكل ، لكن بعد ٢٠٠٣ أصبحت كل الدول العربية مهددة من الداخل والخارج في وقت واحد ، القضية من بعد ٢٠٠٣ مبقيتش قضية فلسطين فقط ، ولا التفاوض حالياً كان على القطاع فقط ، ولا التفاوض اساساً كان مع بي بي فقط .الشيء الصعب في المشهد الاقليمي ان كل الدول العربية عندها تهديدات جدية ، مصر عندها سد النهضة والإخوان ، سوريا بقت حتت وكل حتة ليها موقف لوحدها ، العراق رئيسه كردي وبيتكلم عربي مكسر ، السودان نصه بيدب في النص التاني ، ليبيا ٣ مناطق كل منطقة مقموصة من التانية ، الجزائر والمغرب ممكن تقوم بينهم حرب في اي وقت ، تونس بتتفاوض مع صندوق النقد الدولي على قرض من ٥ سنين ومش عارفة تنجز فيه وعندها مشكلات اقتصادية ضخمة .هي لو القصة فلسطين وبس كان كله حضر والله ، لكن اللعب النهاردة ع الكل مش على القطاع لوحده ، هو حضرتك مخدتش بالك ان في عندنا ٤ ولا ٥ رؤساء دول انتقاليين حضروا النهاردة؟! ، يعني ولا واحد منهم ضامن يكمل في مكانه بكرة الصبح ، هو حضرتك مش ملاحظ ان جيوش المنطقة كلها اتبخرت خلاص ، مش واخد بالك ان ايران وتركيا راشقين في غالبية الدول العربية وهما اللي بيحددوا مواقفهم اصلاً!!!الحقيقة ان الامن القومي العربي ده مبقاش حنجوريات وكلام شعبوي مالوش لازمة ، بقى معادلات محسوبة بالشعرة وأطراف كتير داخلة فيها ، وكل حاكم عربي بيبص وراه وقدامه في نفس الوقت النهاردة ومش عارف الضربة هتجيله منين بالضبط ، انت بتاخد موقف ضد طرامب مش بي بي ، ضد امر-يكا مش الكيان ، وده يخلي لكل موقف ٥٠٠ حساب!ولا تنسوا ان اجواء التناغم الرو-سي الأمر-يكي الحالية ليها تاثير برضو ، يعني الجزائر مثلاً السبب الرئيسي في عدم حضور رئيسها هو الموقف الرو-سي ، الخليج كله واقع في حوارات مع امر-يكا ، فيبقى الحل هنا هو الموقف المطلوب مع مصر مع خطوة للخلف كده علشان المجانين اللي بنتفاوض معاهم مش اكتر!تاني ، احنا النهاردة عملنا مشروع عملي شامل سياسي اقتصادي اجتماعي لإعادة اعمار القطاع في ٣ سنين ، وجمعنا الفلوس ، وهنعمل صندوق لإعادة الإعمار ، يعني الشئ اللي كان طرمب بيقول عليه مستحيل بقى ممكن وبالورقة والقلم كمان ، ممكن بقى نسيب دفتر الحضور والانصراف على جنب ونحتفل شوية قبل ما ندخل ع المعجنة اللي بعد كده؟!!ايوة ، سواء حرب داخلين على معجنة ، سواء سلام برضو داخلين على معجنة لان العالم كله هيتابع ويبص ويشوف مصر بتتكلم بجد وهتنفذ بجد ، ولا بتبيع كلام وخلاص؟!!!
