عندما تدخل و تتصفح في حساب الدكتور هاني الناظر الأستاذ بقسم الأمراض الجلدية بمركز البحوث و الرئيس الأسبق للمركز تكتشف أنك في عالم شَيق لا تستطيع مغادرته سريعاً فهو كنز للمعلومات الطبية و السلوكيات العامة و دحض الشائعات .
و في هذه الأيام يكتب الناظر عن حكايلت يراها و يسمعها كل يوم أثناء عمله و يُشرك متابعيه معه في قراءتها و منها كتب :
حكايات الإجازات …
حفيدتي خمس سنوات ناموسة قرصتها فقالت لي لو سمحت اهرش لي مكانها علشان بتوجعني فقلت لها وانتي ما تعرفيش تهرشي لنفسك ؟ فردت وقالت لي مش انت دكتور امراض جلدية اكيد لمًا تهرش لي هاخف ! وجهة نظر بس الحمد لله ان ده تفكير الاطفال فقط .
و حكاية أخري :
انزل اروح السوبر ماركت الكبير المشهور باسعاره المعقولة وطبعا ده شئ انا لا اقوم به الا نادرا وفي الاجازات الطويلة ..المهم وانا بتجول في المكان المخصص للفاكهة فوجئت بيافطة صغيرة مكتوب عليها مانجو فص الكيلوجرام ب ١٤٠ جنيه ! طبعا انا قلت اكيد الرقم غلط وروحت للشاب المسؤل عن المكان وقلت له الرقم ده صح ؟ فقال لي نعم صح ! فسالته ودي الواحد ياكلها عادي ؟ فرد وهو بيضحك وقال لي لا طبعا دي علشان حضرتك تتصور سلفي معاها وتنزلها علي الانستجرام والناس تقول عليك نمبر ون .. ضحكت من خفة دمه وقلت له لا يا عم اديني بطيخة وخليني نمبر تن احسن .
أما هذه الحكاية فهي مثيرة للضحك :
دكتور الحقني !خير يا مدام حصل ايه ؟. شعري بيقع بشكل غير طبيعي ! الف سلامة ياهانم يا تري فجأة ولا من مدة ؟من سنين يا دكتور !!! طيب ازاي يا هانم علي كدة المفروض لما اكشف علي حضرتك لن اجد شعرة واحدة في فروة الراس ! لا طبعا يا دكتور في شعر !وريني كدة يا هانم امممم ما شاء الله شعر حضرتك معقول ولكن حاضر هاكتب لك علاج …بس لو سمحت يا دكتور انا مش بعرف ابلع اقراص وبخاف من الحقن ومش بستحمل اي دهانات علي فروة راسي !! طيب يا مدام اعالج حضرتك ازاي ؟اتصرف لو سمحت مش حضرتك دكتور ! حوار حقيقي دار بيني وبين مريضة من كام يوم وطبعا بلاش تسالوني انا اتصرفت ازاي .
